«Դպրոցասեր» հայկական կրթահամալիրի շրջանավարտների դիպլոմների հանձնման հանդիսավոր արարողություն

25 հունիսի, 2023

Հունիսի 25-ին կայացավ Ֆրանսիայի Լը Ռենսի (Le Raincy) քաղաքում գտնվող «Դպրոցասեր» հայկական կրթահամալիրի շրջանավարտների դիպլոմների հանձնման հանդիսավոր արարողությունը։

Տարեվերջյան այս միջոցառմանը ներկա էին Լը Ռենսիի քաղաքապետ Ժան-Միշել Ժենըստիեն, մոտակա քաղաքներից՝ Լիվրի Գարգանի քաղաքապետ Պիեռ-Իվ Մարտենը, Ֆրանսիայում ՀՀ դեսպանության առաջին քարտուղար Վարդուհի Սահակյանը, Նորվան Արք․ Զաքարեանը, Լը Ռենսիի քաղաքային խորհրդի անդամներ, աշակերտներ և ծնողներ։

Դեսպանության ներկայացուցիչը, շնորհավորելով շրջանավարտներին, հաջողություն մաղթեց նրանց հետագա ուսումնառության ընթացքում։ Երախտագիտության խոսքեր ուղղվեցին «Դպրոցասեր»-ի տնօրինությանը` ի դեմս տնօրեն Հայկ Սարգսյանի, դպրոցի ուսուցիչներին, «Դպրոցասեր»-ի Տիկնանց և բարեկամների ասոցիացիային՝ ի դեմս նախագահ Աղավնի Սարիկայայի, հայոց լեզվի և հայապահպանության գործում կարևոր ներդրման համար, ինչպես նաև Ֆրանսիայի իշխանություններին՝ ֆրանսահայ կրթական հաստատությունների գործունեությանը ցուցաբերվող աջակցության համար։

Ծանոթություն․ «Դպրոցասեր» հայկական կրթական համալիրը ստեղծվել է 1879թ. Կոնստանդնուպոլսում՝ որպես օրիորդաց դպրոց։ Հայոց ցեղասպանությունից փրկված դպրոցի ուսուցչական և աշակերտական անձնակազմը 1920-աններին ֆրանսիական իշխանությունների հոգածությամբ տեղափոխվել է Ֆրանսիա։ 1924թ. «Դպրոցասեր»-ը տեղակայվել է Մարսել քաղաքում, իսկ 1928թ.-ից գործում է փարիզամերձ Լը Ռենսի քաղաքում՝ հանդիսանալով Ֆրանսիայում ամենահին հայկական կրթական հաստատությունը։ Ֆրանսիական հանրակրթական ծրագրին զուգահեռ՝ «Դպրոցասեր»-ը ներառում է նախակրթարան և քոլեջ, որտեղ, ֆրանսիական հանրակրթական ծրագրին զուգահեռ, դասավանդվում են նաև հայերեն լեզվով առարկաներ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր